lagta nahin hai ji mera ujde diyaar mein
kiski bani hai aalam-e-napaayedaar mein
bulbul ko pasbaa(n) se na sayiyaad se gila
kismat mein qaid thi likhii fasal-e-bahaar mein
keh do in hasraton se kahin aur ja basen
itni jagah kahan hai dil-e-daagdaar mein
ik shaakh-e-gul pe baith ke bulbul hai shaadmaa(n)
kaante bichhaa diye hain dil-e-laalajaar mein
umar-e-daraaz maang ke laaye the chaar din
do aarzoo mein kat gaye do intezaar mein
hai kitna badnaseeb "jafar" dafn ke liye
do gaj zameen bhi na mili ku-e-yaar mein
No comments:
Post a Comment